TOROK PERSEMBAHAN MALAM KAMIS PUTIH

Io... Ame Pastor Paroki Maria Bunda Segala Bangsa (MBSB ). Tabe wie

One wie ho,o... Hami ata ngasang umat Dite one Paroki Maria Bunda Segala Bangsa ( MBSB) ho,o, etan ata tua, wan ata koe, padir wa’i rintuk sa’i. Mai naring agu hiang Mori Yesus Sengaji gami, ata ba reweng agu tuing,  kudut ami ata ngasang anak Dite,  molor lonto golo, balas labar cama olo  natas, neka bahas agu bike, cama cama lewang ngger peang, cama cama po'e ngger one.

 Ame Pastor, lonto torok ho'o, am toe kopn, padir wa'i rintuk sa'i, am toe manikn, ai nai gami penong saki, beo penong ndekok, natas labar lanar salah kanang. Ame Pastor one Ite lami tombor situ, ai Ite ata kopn agu naun tau gendo ndekok gami , podo agu tegi ampong  le Mori Wowo.

One leso ho,o, hami mai tiba, agu hang cama roti agu anggur nggeluk, celung Weki agu Darah run  Mori Yesus . One hami hitu tae, kudut neka manga hang toe tanda, inung toe nipu, daku ngong data, hebur le tebur lau.  Leso  ho,o kole, hami ata ngasang umat Dite, mai nipu wintuk ata poli pede tae te latang ase kae de Mori Yesus, "Waca Wa,i de Murid run". One hami hitu tae, kudut  ba hambor one mose kaeng kilo, cumang hae ata, one lonto Golo agu lejong beo.

Kongkol gami tombo, kukut  gami curup, kengkel gami reweng, maram reweng ca gewek, kaping Ite Ame Pastor. Pingas Lite sina, sengets Lite le. Ngger olo Ite lami podor. Tibas Lite sina  ai Ite ata naun agu patutn , te letang temba  laro jaong , kaping Mori Sengaji eta Compang  Nggeluk.

Landing hitu Ame Pastor, hami toe mai  bajar kanang. Bas lami Roti, anggor, wua agu wela haju , hasil gori agu gejur  gami, nggitu kole nai de sanggen taung umat dom.

Ame Pastor, lemba koes lite ngger le Mori dewa, podos Lite ngger le Mori Wowo, Lele s ngger le Mori Dedek.

Tegi agu gesar gami Ame Pastor kaping Mori Sengaji:

Te latang, Ame Paus, Ame Uskup, Ame Pastor, Frater, Bruder agu suster, cewen kole Ame Pastor Paroki MBSB ho’o: Mori …ting koe berkak ise, porong bolek koe loker agu bacang  koe tara. Neka reding le beti Neka penes le menes. Neka manga pala ranga agu cumang dungka. Neka manga Ronggo do,ong agu pangga watang. Ting koe ise mberes porong neka manga podok agu do'ong le Golo tau kerja one uma de Mori Sengaji.

Latang sanggen umat dom one natas Paroki MBSB:

Mori…Ampong  koes  sala  gami,  ai nai penong saki,  ndekok  penong  beo, sala dami lanar neho satar mambar. Wancing nggaring koe nai gami we'ang gerak. Porong neka tadang agu agama, neka becang  agu gereja. Neka hemong wero ndekok, neka malas bajar sala. Neka tunda gaji gula, neka tingul ngaji minggu.

Ting koe berkak agu mberes,  porong  neka ngonde holes,  neka mejeng hese, tau kawe hang mame, cumang hang gula, remong hang leso,  nggitu kole ngasang wengko weki. Neka manga inung toe nipu, hang toe tanda, gaku ngong data, hebor le tebur lau.

Nggitu kole porong mbajik pantil,  reje leleng, maras bantang cama, porong  molor lonto kaeng Golo. Cama cama lampa wanang agu  wejong leo. Neka mamur  hae mbaru, Neka kode ngong woe, neka acu ngong wa’u, rantang hau da lata. Porong imus isung keri ga, agu tawa ranga. Todo kongkol kote oles. Rame raes. Uwa haeng gula, langkas haeng ntala.

Mori...., hos gami tombo, am tombo toe molorn, hos   reweng, am reweng toe jepekn,  hos  tura, am tura toe duhan. Landing Mori Yesus ata imbi gami , pu’ung du wangkan, leso ho’o agu sangge tedeng len, Amen. Toe bajar kanang…… Ho.. Lapengn.

 

KBG St. Matius , Kamis Putih 2026

Stefanus Satu